亞速鋼鐵廠人道處理的外交機會

https://finance.yahoo.com/news/1-russia-says-evacuate-wounded-135119209.html
按照外媒報導，俄軍回應烏國軍眷同意放行部分受傷烏軍離開鋼廠。
此舉正好為三方爭取外交同軍事佈置空間：烏國政府可考量借俄軍先停火來回應同試探俄軍喺頓巴斯同南部停火條件，籌碼係俄國喺全球資產同普京權位。
普京當下最關心就係自身安危同俄國瀕瓦解，因為再打落去普京權位必然勢危，可能普京自己都想搵出誤判攻烏理由，同埋俄軍戰場攻守不濟嘅原因，包括佢一直引以為傲嘅情報訊息戰幾乎一塌糊塗。
停火時間越耐，重整俄國國內軍政系統，同埋鞏固頓巴斯俄裔地區及後面嘅俄烏邊境接壤防禦工事越有利。最重要係爭取到時間處理個人健康、其家人在歐資產及重要人事分佈安排同任用，關乎佢自身安全，聰明一着係唔應該兩面作戰腹背受敵，贏回國內同烏東民心更重要。
中國就更加唔使講，外交部幾乎可以執死雞，可以搶在G7開會對華強硬“用刑”前發個聲明扮調停又得，或者真係整個中立場俾俄烏兩國開會又得，度下用咩交換歐美放鬆對華壓力同關稅，順便對烏國同歐盟表達善意，以及同英美認真坐低傾下台灣同香港問題，到底可唔可以互相調整下政策。現在北京政府內外交困，呢個應該係一閃而逝嘅執死雞撿現成機會。講得成停火條件，應係現屆北京政府一個外交政績重要宣傳點，以後都可以拎住條停火協定新聞片播足一千次做大國崛起片頭都得。
最開心，莫過於軍眷同受傷軍人，得以家庭團聚，而唔係陰陽永隔。